सर्वोच्च अदालतले नागा बाबाहरूको निर्वस्त्र परम्परा अश्लील नभएको ठहर

 भाद्र १०, २०८२ 

सर्वोच्च अदालतले महाशिवरात्रि अवसरमा पशुपति क्षेत्रमा हुने नागा बाबाहरूको निर्वस्त्र परम्परा धर्म र हिन्दू संस्कृतिको हिस्सा भएकाले अश्लील नभएको व्याख्या गरेको छ।

सर्वोच्च अदालतले महाशिवरात्रिको अवसरमा पशुपति क्षेत्रमा नागा बाबाहरू निर्वस्त्र बस्ने परम्परा अश्लील नभएको स्पष्ट पारेको छ।

न्यायाधीश कुमार चुडाल र नहकुल सुवेदीको संयुक्त इजलासले यस विषयमा परेको रिट खारेज गर्दै नग्नता र अश्लीलताको व्याख्या सापेक्ष हुने ठहर गरेको हो।

२०७४ माघ २८ गते दायर उक्त रिटमा नागा बाबाहरू सार्वजनिक स्थलमा निर्वस्त्र बस्ने, शरीरको खरानी महिला र बालबालिकालाई लगाइदिने जस्ता कार्यलाई अश्लीलता ठहर गर्दै प्रतिबन्धको माग गरिएको थियो। साथै ती क्रियाकलापले महिला तथा बालबालिकामाथि यौनजन्य हिंसा र नकारात्मक मानसिक असर पर्न सक्ने दाबी गरिएको थियो।

तर, २०८१ भदौ २७ गते सुनाइएको फैसलाको पूर्णपाठमा सर्वोच्चले नागा बाबाको उपस्थिति र गतिविधि सनातन धर्म र हिन्दू संस्कृतिअनुकूल रहेको व्याख्या गरेको छ।

संविधानले धर्म, संस्कृति र परम्पराको संरक्षण गर्दै धार्मिक स्वतन्त्रताको अधिकार सुनिश्चित गरेको स्मरण गराउँदै अदालतले नागा साधुहरूलाई पशुपति क्षेत्रमा प्रवेश निषेध गर्नु उनीहरूको धार्मिक अभ्यासमाथि हस्तक्षेप हुने बताएको छ।